Fondsinsamelingsprojekte

TORING PROJEK FONDSINSAMELING

Die stellasies is opgestel, die ingenieurs doen hulle ding en die bouers staan gereed om die toring te herstel!  Die asbesdak word verwyder en vervang met ʼn nuwe eko-vriendelike alternatief.  Intussen mag ons weer die kerkgebou en die ouditorium gebruik, waaroor ons baie dankbaar is.

Al hierdie dinge kom egter teen ʼn prys – ʼn geskatte R2 000 000!

Die dak was iets wat ons vir die afgelope tien jaar weet vervang móét word.  Toe ons beplan het om ons ‘inverter’ uit te brei met sonpanele, was die asbesdak weer ʼn struikelblok, want nuwe regulasies verbied jou om sonpanele op asbes te installeer.  Die toring se verkrummeling het ons eintlik net gedwing om dit nou dadelik te doen.

Ons weet dat R2000 000 baie geld is, maar ons het ons huiswerk gedoen en ons is daarvan oortuig dat dit die mees koste-effektiewe plan is.  Om die toring af te breek, soos baie lidmate voorgestel het, was ʼn opsie, maar dit sou baie beslis selfs nóg duurder gewees het.

Die gemeente se geboue is vir ons almal kosbaar – om daarsonder te wees, is byna ondenkbaar en daarom nooi ons elke lidmaat uit om deel te neem aan hierdie spanpoging om die koste van die toring se herstelwerk so gou as moontlik te verhaal, sonder dat dit ons gemeente se bediening aan bande lê.

Ons wil elke lidmaat hiermee uitnooi om ʼn blokkie op die toring te ‘koop’ @R1500.  Jy kan ʼn eenmalige bydrae maak of jy kan jou R1500 afbetaal oor die drie jaar.  Of gee enige bedrag wat die Here op jou hart lê.

Jy kan dit op die gewone manier in ons bankrekening inbetaal – EFT of snapscan of  jy kan dit by die kerkkantoor kom inbetaal.  Al wat ons vra is dat jy asb ʼn duidelike verwysing sal maak #toringfonds.

Maak dit asb ʼn saak van gebed, soos dit inderdaad vir ons is.

Die Toring-komitee